“Böyük Qayıdış” çərçivəsində Şuşada səyyar tibbi müayinələr davam edir

13 İyun 2026

158

“Böyük Qayıdış” çərçivəsində Şuşada səyyar tibbi müayinələr davam edir

Azərbaycan Respublikası Səhiyyə Nazirliyinin Elmi-Tədqiqat Ağciyər Xəstəlikləri İnstitutunun tibb heyəti “Böyük Qayıdış” proqramı çərçivəsində işğaldan azad olunmuş ərazilərə köçürülən vətəndaşların sağlamlığının qorunması, xəstəliklərin erkən aşkarlanması və tibbi xidmətlərin əlçatanlığının artırılması məqsədilə səyyar tibbi müayinələri davam etdirir.

Azmedinfo.az xəbər verir ki, tədbir zamanı ümumilikdə 180-ə yaxın Şuşa sakini tibbi müayinələrdən keçib. Eyni zamanda iştirakçılara ağciyər xəstəliklərinin risk faktorları, erkən əlamətləri və profilaktik tədbirlər barədə maarifləndirici məlumatlar verilib.

Bu çərçivədə növbəti aksiya Şuşa şəhərində təşkil olunub. Aksiya zamanı Səhiyyə Nazirliyi Elmi-Tədqiqat Ağciyər Xəstəlikləri İnstitutunun ixtisaslaşmış tibb heyəti tərəfindən yerli sakinlərə kompleks tibbi xidmətlər göstərilib. Müayinələr xüsusi avadanlıqlarla təchiz olunmuş səyyar klinikada aparılıb və modul tipli mobil laboratoriyanın imkanları sayəsində müxtəlif diaqnostik xidmətlərin yerində həyata keçirilməsi təmin edilib.

Aksiya çərçivəsində pulmonoloq, ftiziatr, allerqoloq, kardioloq, şüa diaqnostikası və laboratoriya üzrə mütəxəssislər tərəfindən flüoroqrafiya, rentgen, elektrokardioqrafiya (EKQ), exokardioqrafiya, ultrasəs müayinəsi (USM), spirometriya, Mantou sınağı və arterial qan qazlarının analizi kimi müayinələr icra olunub. Müayinələr zamanı aşkarlanan sağlamlıq problemləri olan şəxslərə dərhal tibbi məsləhətlər verilib, zəruri hallarda müalicə təyin edilib və ixtisaslaşmış həkimlərə yönləndirmə aparılıb.