Son illərdə oturaq həyat tərzi və hərəkətsizlik səbəbindən onurğa xəstəliklərindən əziyyət çəkənlərin sayısı sürətlə artmaqdadır.

Azmedinfo.az xəbər verir ki, Vertebra Onurğa Mərkəzinin verdiyi məlumata görə, mərkəzə müraciət edən bir pasientin müayinəsi zamanı olduqca mürəkkəb və xüsusi diqqət tələb edən klinik vəziyyət qeydə alınıb. Pasientin boyun nahiyəsində, həyati əhəmiyyət kəsb edən beyincik və uzunsov beyinə yaxın məsafədə onurğa beynini sıxan və ona birbaşa təmas edən təhlükəli fəqərəarası disk yırtığı aşkarlanıb. Vəziyyəti daha da mürəkkəbləşdirən digər əsas məqam isə pasientin həm döş, həm də bel fəqərələrini tamamilə örtən hemangiomanın, yəni xoşxassəli damar şişinin mövcudluğu olub. Mərkəzin mütəxəssisləri neyrocərrahın konsultasiyasından sonra, hemangioma riskini nəzərə alaraq, xəstəyə qan dövranını stimullaşdıran heç bir elektroterapiya üsulu tətbiq etmədən tamamilə təhlükəsiz və fərdiləşdirilmiş müalicə proqramına başlayıblar.

Vertebra Onurğa Mərkəzinin ekspertləri bildirirlər ki, onurğada eyni anda həm yırtığın, həm də hemangiomanın rast gəlinməsi müalicə metodunun seçilməsində xüsusi həssaslıq tələb edir. Boyun nahiyəsindəki disk yırtıqları əsasən uzun müddət kompüter və telefon qarşısında yanlış oturuş, boyun əzələlərinin zəifliyi və travmalar səbəbindən yaranır. Fəqərə hemangioması isə fəqərə daxilində damarların genişlənməsi ilə xarakterizə olunan, daha çox genetik və anadangəlmə faktorlara bağlı bir patologiyadır. Belə vəziyyətlərdə onurğaya isti prosedurlar etmək və ya elektrik cərəyanı vermək qətiyyən olmaz, çünki bu, damar şişinin böyüməsinə və ya fəqərənin strukturunun zəifləməsinə yol aça bilər.

Bu cür ciddi onurğa problemlərindən qorunmaq və fəsadların qarşısını almaq üçün pasientlər bəzi mühüm ehtiyat tədbirlərinə mütləq əməl etməlidirlər. İlk növbədə, həkim və neyrocərrah rəyi olmadan heç bir masaj, fiziki müalicə və ya idman növünə başlamaq olmaz. Bundan əlavə, onurğanın yükdaşıma qabiliyyəti zəiflədiyi üçün ağır əşyalar qaldırılmamalı və hər hansı onurğa ağrısı zamanı yalnız rentgenlə kifayətlənməyib, problemin dərinliyini görən MRT müayinəsindən keçilməlidir.