İnsan İmmunçatışmazlığı Virusu (İİV) uzun müddət heç bir klinik əlamət büruzə vermədən, latent mərhələdə inkişaf edə bilsə də, orqanizmin immun sistemini, xüsusilə CD4 limfositlərini tədricən zəiflətməyə davam edir.

Azmedinfo.az xəbər verir ki, Səhiyyə Nazirliyi Respublika QİÇS-lə Mübarizə Mərkəzinin Təşkilati-metodiki şöbəsinin həkim-metodisti Səbinə Nəbizadənin sözlərinə görə, simptomların olmaması infeksiyanın təhlükəsiz və ya qeyri-yoluxucu olması anlamına gəlmir; pasiyent statusundan xəbərsiz olduqda yoluxdurma riski dəfələrlə artır. Mütəxəssis qeyd edib ki, vaxtında başlanılan antiretrovirus terapiya (ART) virus yükünü təyin olunmayan həddə endirərək ötürülmə riskini minimuma çatdırır.

Həkim-metodist vurğulayıb ki, immun sisteminin zədələnməsi orqanizmin müdafiə qabiliyyətini azaltdığından, İİV-lə yaşayan şəxslərdə müxtəlif orqan və sistemləri zədələyən opportunistik (fürsətcil) infeksiyaların inkişaf riski yüksəlir. Müalicənin davamlılığını təmin etmək üçün təyin olunmuş dərmanların rejimə uyğun qəbul edilməsi mütləqdir: dərmanların özbaşına dayandırılması və ya qeyri-müntəzəm qəbulu virusun preparatlara qarşı rezistentliyini (müqavimətini) formalaşdırır və bu halda fərdi laborator göstəricilər əsasında müalicə sxeminin dəyişdirilməsi tələb olunur.

Tibb işçilərinin parenteral yoluxma riskindən qorunması məqsədilə hər bir pasiyentə potensial yoluxma mənbəyi kimi yanaşılmalı, fərdi qoruyucu vasitələrdən istifadə və alətlərin sterilizasiyası qaydalarına ciddi əməl edilməlidir. Təsadüfi zədələnmə baş verdikdə isə dərhal təmasdan sonrakı profilaktikaya (PEP) müraciət olunmalıdır. S.Nəbizadə cəmiyyətdəki stiqma və ayrı-seçkiliyin də xəstəliyin erkən aşkarlanmasına və müalicəyə sadiqliyə ən böyük maneələrdən biri olduğunu, bu səbəbdən əhali və risk qrupları arasında maarifləndirmə tədbirlərinin ardıcıl şəkildə davam etdirildiyini diqqətə çatdırıb.