Endoskopik müayinələrə hazırlıq prosesində pasiyentin mütəmadi qəbul etdiyi preparatlar, xüsusilə qan durulducular ciddi nəzarət tələb edən əsas amillərdəndir.

Azmedinfo.az xəbər verir ki, qastroenteroloq, hepatoloq, invaziv endoskopist Aqil Ağakişiyevin sözlərinə görə, bu cür dərmanların dayandırılıb-dayandırılmaması qəbul edilən preparatın növü və dozası, böyrəklərin funksional vəziyyəti, eləcə də planlaşdırılan müdaxilə zamanı yarana biləcək qanaxma riski əsasında müəyyənləşdirilir.

Həkim qeyd edir ki, bəzi prosedurlarda qanaxma təhlükəsini minimuma endirmək məqsədilə preparatın qəbuluna müvəqqəti fasilə verilməsi vacibdir, digər hallarda isə müalicə kursunu fasiləsiz davam etdirmək mümkündür.

Pasiyentlər bu qərarı heç bir halda sərbəst şəkildə verməməli, dərmanların qəbul qaydasını və dozasını yalnız müalicə həkiminin rəyi əsasında tənzimləməlidirlər. Prosedura düzgün və peşəkar hazırlıq müayinənin həm təhlükəsiz, həm də maksimal dərəcədə effektiv nəticələnməsinin başlıca təminatıdır.