15 Sentyabr – Ümumdünya Limfoma ilə Mübarizə Günü limfatik sistemin bədxassəli şiş xəstəlikləri barədə ictimai məlumatlılığı artırmaq və erkən diaqnostikanın həyati əhəmiyyətini diqqətə çatdırmaq məqsədilə hər il beynəlxalq miqyasda qeyd edilir.

Azmedinfo.az xəbər verir ki, immun sisteminin mühüm tərkib hissəsi olan limfositlərin nəzarətsiz çoxalması nəticəsində formalaşan limfomalar tibbi təsnifatda əsasən iki qrupa — Hodgkin və Qeyri-Hodgkin formalarına bölünür. Hodgkin limfoması xüsusi Rid-Şternberq hüceyrələrinin varlığı ilə xarakterizə olunur və vaxtında müdaxilə edildikdə tam sağalma ehtimalı olduqca yüksək qiymətləndirilir. Qeyri-Hodgkin limfoması isə daha çoxsaylı alt tiplərə malik olub, həm ləng gedişli, həm də sürətlə inkişaf edən klinik mənzərə ilə təzahür edə bilir.

Xəstəliyin ən səciyyəvi ilkin əlaməti boyun, qoltuqaltı və ya qasıq nahiyəsində ağrısız, hərəkətli limfa düyünlərinin böyüməsidir. Bu lokal dəyişikliklərlə yanaşı, səbəbsiz çəki itkisi, xüsusilə gecələr intensivləşən bədən tərləməsi, davamlı zəiflik və dalğavari hərarət yüksəlməsi onkoloji prosesin sistemik siqnalları sayılır. İlkin mərhələlərdə simptomlar adi infeksion xəstəliklərlə qarışdırıla bildiyi üçün uzun müddət keçməyən limfadenopatiyalar zamanı dəqiq histopatoloji və laborator müayinələrin aparılması vacibdir. Müasir hematologiyada tətbiq olunan polikimyaterapiya, immunoterapiya və hədəfli bioloji preparatlar erkən mərhələdə diaqnoz qoyulmuş pasiyentlərdə davamlı remissiya və tam sağalma göstəricilərini əhəmiyyətli dərəcədə yüksəldir.