İnsultun risk amilləri, ilkin əlamətləri və vaxtında tibbi müdaxilənin əhəmiyyəti barədə əhalinin maarifləndirilməsi xəstəliyin ağır fəsadlarının qarşısının alınmasında mühüm rol oynayır. Bu məqsədlə hər il 29 oktyabr Ümumdünya İnsultla Mübarizə Günü kimi qeyd olunur.


Azmedinfo.az insultdan qorunmaq üçün nələrə diqqət edilməli olduğunu mütəxəssislərin rəyinə əsaslanaraq təqdim edir:

İnsult beyində qan dövranının pozulması nəticəsində yaranan və təcili tibbi müdaxilə tələb edən ciddi vəziyyətdir. Yüksək arterial təzyiq, şəkərli diabet, qanda xolesterinin yüksək olması, siqaret istifadəsi, artıq çəki və fiziki hərəkətsizlik insult riskini artıran əsas amillərdəndir.

Mütəxəssislər insult riskini azaltmaq üçün arterial təzyiqin müntəzəm yoxlanılmasını, şəkərli diabet və xolesterin səviyyəsinin nəzarətdə saxlanılmasını, sağlam və balanslı qidalanmanı, duz qəbulunun məhdudlaşdırılmasını, müntəzəm fiziki aktivliyi və tütün məhsullarından uzaq durmağı tövsiyə edirlər. Xroniki xəstəlikləri olan şəxslər həkim müayinələrini gecikdirməməli və təyin olunmuş müalicəyə əməl etməlidirlər.

İnsult zamanı üzün bir tərəfində əyrilik, qol və ya ayaqda qəfil zəiflik və keyimə, nitqin pozulması, qəfil görmə dəyişikliyi, başgicəllənmə və tarazlığın itirilməsi müşahidə oluna bilər. Bu əlamətlərdən hər hansı biri qəfil yarandıqda, öz-özünə keçməsini gözləmək olmaz.

Belə hallarda dərhal 103 təcili tibbi yardım xidmətinə zəng etmək lazımdır. Əlamətlərin başladığı vaxtı qeyd etmək vacibdir. Əlamətlər bir neçə dəqiqədən sonra keçsə belə, tibbi yardımdan imtina edilməməlidir. Erkən müdaxilə həyatın xilas edilməsi və ağır fəsadların azaldılması baxımından həlledici ola bilər.

İnsult zamanı hər dəqiqə önəmlidir. Risk amillərinə nəzarət etmək, xəstəliyin ilkin əlamətlərini tanımaq və vaxtında tibbi yardım almaq insultla mübarizənin ən vacib şərtlərindəndir.