Azərbaycan Respublikası Səhiyyə Nazirliyinin K.Y. Fərəcova adına Elmi-Tədqiqat Pediatriya İnstitutunda (ETPİ) rezidentlərin növbəti seminarı keçirilib.

Azmedinfo.az xəbər verir ki, seminarın cərrahi panelində rezidentlər aktual klinik mövzulara həsr olunmuş təqdimatlarla çıxış ediblər. Belə ki, Səma Quluzadə “Boyun törəmələri”, Aytac Paşayeva “Duodenal patologiyalar”, İnqilab Quliyev “Öd daşı xəstəliyi”, Alxan Şərifov isə “Anadangəlmə bronxopulmonar patologiyalar” mövzularında məruzələr təqdim ediblər.

İnstitutda rotasiyada olan Qazaxıstan Respublikasının Astana Tibb Universitetinin rezidenti Asiya Haydarova “Uşaqda suçiçəyinin yumşaq toxumaların nekrotik infeksiyası ilə ağırlaşması: klinik hal” mövzusunda təqdimatla çıxış edib.

Qeyd edək ki, Astana Tibb Universitetində uşaq cərrahiyyəsi ixtisası üzrə təhsil alan iki həkim-rezident – Murzalina Sahilya və Haydarova Asiya oktyabrın 17-dən 31-dək ETPİ-də ixtisaslarına uyğun təcrübə proqramında iştirak edirlər.

Təqdimatlardan sonra mövzular ətrafında geniş müzakirələr aparılıb, iştirakçıların sualları cavablandırılıb, klinik hallar üzrə fikir mübadiləsi keçirilib. Seminarın yekununda rezidentlərin təqdimatları qənaətbəxş qiymətləndirilib.

Bu cür seminarların keçirilməsində əsas məqsəd rezidentlərin nəzəri biliklərini dərinləşdirmək, klinik təcrübələrini təkmilləşdirmək və onların peşəkar inkişafına dəstək olmaqdır.

Hazırda institutda ümumilikdə 48 rezident təhsil alır. Onlardan 26-sı pediatriya, 12-si uşaq cərrahiyyəsi, 8-i neonatologiya, 2-si isə uşaq qastroenterologiyası ixtisasları üzrə hazırlıq keçir.