Payız-qış mövsümündə kəskin respirator virus infeksiyalarının və mövsümi qripin yayılma riskinin azaldılması məqsədilə Azərbaycanda profilaktik tədbirlər həyata keçirilir. Bu çərçivədə əhalinin qripə qarşı peyvəndlənməsi təşkil olunur.

Azmedinfo.az xəbər verir ki, TƏBİB-dən APA-ya verilən məlumata görə, Səhiyyə Nazirliyi tərəfindən cari ildə də ölkəyə mövsümi qripə qarşı vaksinlər gətirilib. Bakı və Sumqayıt şəhərlərində dövlət tibb müəssisələri vaksinlərlə təmin olunub və peyvəndlənməyə başlanılıb. Regionlarda isə vaksinlərin tibb müəssisələrinə çatdırılması mərhələli şəkildə davam etdirilir.

Bildirilib ki, bu il Niderland istehsalı olan “Influvac Tetra” adlı dördlü qrip vaksini istifadə olunur. Peyvənd qripə yoluxma riskini, xəstəliyin ağır keçmə ehtimalını və hospitalizasiya zərurətini azaltmağa kömək edir.

Peyvəndlənmə xüsusilə risk qrupuna daxil olan şəxslər üçün tövsiyə edilir. Bu qrupa 6 aydan yuxarı uşaqlar, 65 yaşdan yuxarı şəxslər, xroniki xəstəlikləri və immun sistemi zəifliyi olan insanlar, hamilə qadınlar, eləcə də tibb işçiləri daxildir.

Məlumata əsasən, qripə qarşı vaksinasiya könüllüdür. Peyvənd olunmaq istəyən şəxslər ərazi üzrə ilkin səhiyyə xidməti göstərən dövlət tibb müəssisələrinə müraciət edə bilərlər. Regionlarda vaksinlərin mövcudluğu və peyvəndlənmə ilə bağlı ətraflı məlumatı ailə həkimlərindən almaq mümkündür.