Moskvada L. M. Roşal adına Uşaq Elmi-Klinik Mərkəzinin həkimləri qız uşağının nazik bağırsağından kosmetik süngər çıxarıblar. Əşyanın yerləşdiyi nahiyədə toxumalar öz həyat qabiliyyətini itirdiyindən bağırsağın həmin hissəsinin cərrahi yolla çıxarılması zərurəti yaranıb. B

Azmedinfo.az "Vesti" nəşrinə istinadən yazır ki, bu barədə Moskva vilayətinin Səhiyyə Nazirliyi məlumat yayıb.

Uşaq güclü qarın ağrısı, qusma və nəcisin olmaması şikayətləri ilə təcili tibbi yardım avtomobili vasitəsilə xəstəxanaya çatdırılıb. Həkimlər bağırsaq keçməzliyi diaqnozu qoyaraq pasiyenti cərrahiyyə şöbəsinə yerləşdiriblər.

Hadisənin səbəbi əməliyyat zamanı müəyyənləşib. Məlum olub ki, qız uşağı təxminən beş gün əvvəl kosmetik süngər udub. Həkimlərin ilkin qiymətləndirməsinə görə, yad cisim həmin müddət ərzində orqanizmdə qalıb. Cərrahlara laparotomiya – qarın boşluğunun açılması yolu ilə aparılan cərrahi müdaxilə həyata keçirmək lazım gəlib.

“Əməliyyat zamanı yad cismin yerləşdiyi nazik bağırsaq sahəsində nekroz aşkarlandı. Təəssüf ki, həmin nahiyənin toxumaları həyat qabiliyyətini itirmişdi. Buna görə də onu ultrasəs koaqulyatorunun köməyi ilə çıxarmaq məcburiyyətində qaldıq”, – deyə cərrah Muxtar Məmmədov bildirib.

Əməliyyat təxminən iki saat davam edib və həkimin sözlərinə görə, heç bir ağırlaşma baş verməyib. Cərrahi müdaxilədən sonra onuncu gün qız uşağı vəziyyəti qənaətbəxş qiymətləndirilərək evə buraxılıb.

Mərkəzin mütəxəssisləri valideynlərə xəbərdarlıq edərək bildiriblər ki, uşaq hər hansı yad cisim udduqda dərhal tibbi yardıma müraciət edilməlidir. Belə hallarda yad cismi müstəqil şəkildə çıxarmağa çalışmaq olmaz.