London Kral Kollecinin alimləri tərəfindən aparılan yeni araşdırma tibb işçiləri arasında narkotiklə əlaqəli ölümlərin demək olar ki, yarısının iş yerində qəbul etdikləri dərmanlarla əlaqəli olduğunu müəyyənləşdirib.

Azmedinfo.az xəbər verir ki, adıçəkilən tədqiqat narkotik asılılığı ucbatından həyatını itirən tibb işçiləri və ya tələbələrindən bəhs edən ilk hesabat araşdırmasıdır. 

Araşdırmanın aparıcı müəlliflərindən olan doktor Kerolayn Kouplend vurğuladığı kimi, "bu çox narahatedici yazıdır və bizə qayğı göstərən şəxslərin daha çox qayğısına qalmalı olduğumuzu xatırladır".

Tədqiqatçılar 2000-2022-ci illər arasında London Kral Kollecində "Milli psixoaktiv maddələrin istifadəsi üzrə ölüm halları proqramı"nda təqdim olunan 58 koronerin hesabatını təhlil ediblər. Həyatlarını itirdikləri zaman həmin şəxslər xəstəxanada, aptekdə işləyiblər və ya tibb təhsili alıblar. Bu səbəbdən, ciddi nəzarət altında narkotik və psixotrop maddələr onlar üçün əlçatan olub.

Tədqiqata ən çox daxil edilən peşələr anestezioloqlar, ardınca isə ümumi praktikantlar, cərrahlar və psixiatrlar olub. Müəlliflər qeyd  edirlər ki, anestezioloqların daha yüksək nisbəti bu potensial ölümcül dərmanlarla yaxından işləmələri səbəbindən ola bilər.

Ölümün ən çox səbəbi səksəkə və digər psixi pozğunluqları müalicə etmək üçün istifadə edilən opioidlərdən (43 %) və benzodiazepinlərdən (24 %), midazolamdan (10 %), miorelaksant dərman maddələrindən (9 %), anesteziya və ya sedasiya üçün tez-tez istifadə edilən dərmanlardan qaynaqlanıb. Yalnız üç halda ölən tibbi işçisinin orqanizmində kokain kimi qadağan olunmuş narkotik aşkarlanıb.

Müəlliflər aşkar ediblər ki, ölənlərin 69 %-nin tibbi anamnezində ən az bir psixi pozğunluq qeyd olunub. Həmin anamnezlərdə ən çox görülən isə depressiyadır.

Üç halda tibb işçisi peşə etikasının pozulması və ya cinayət işi üzrə araşdırma aparıldığı barədə məlumatlandırıldıqdan sonra intihar edib.

K.Kouplendin sözlərinə görə, bu araşdırma göstərir ki, tibb işçiləri  karyeralara yenicə başladıqları ilk mərhələdən psixi sağlam olmaları üçün onlara dəstək göstərilməsi vacibdir. Səhiyyə işçiləri arasında intihar nisbəti Böyük Britaniyada milli orta göstəricidən 24% yüksək olduğu üçün bu aktual problemdir. Həkimlər və tibb bacıları stresli, gərgin iş mühitində çalışırlar. Bu nöqteyi-nəzərdən, onlara qarşılaşdıqları konkret problemlərə görə fərdi qayğı və dəstək göstərilməsi vacibdir.

Tədqiqat müəlliflərinin fikrincə, sağlam və hərtərəfli qayğı ilə təmin edilmiş əməkdaşların olması milli səhiyyə xidmətinin uğurlu gələcəyinin açarıdır.

Günel Məmmədova

AZMEDİNFO.AZ