Səhiyyə Nazirliyinin Analitik Ekspertiza Mərkəzinin Hüquq şöbəsinin müdiri Tamam Həsənova “Sağlam radio”nun (93 FM) “Sağlam səhər” proqramında həkimlərin reklamla bağlı hüquqi və etik normalarını şərh edib.

Azmedinfo.az xəbər verir ki, onun sözlərinə görə, həkimlər öz peşə fəaliyyətlərini başqa şəxslərin və ya qurumların maraqlarını təbliğ etmək üçün istifadə etməməlidirlər. İnzibati Xətalar Məcəlləsinin 428-ci maddəsinə əsasən, icazəsiz müalicə, profilaktika, diaqnostika və ya reabilitasiya üsullarının reklamı qadağandır. Bu qaydanın pozulması vəzifəli şəxslər üçün 300–500 manat, hüquqi şəxslər üçün isə 1000–2000 manat məbləğində cərimə ilə nəticələnə bilər.

Ekspert əlavə edib ki, “Reklam haqqında” Qanun reklamın əsasən satış və maraq yaratmaq məqsədi daşıdığını müəyyənləşdirir. Lakin “Dərman vasitələri haqqında” Qanuna görə, ölkədə yalnız reseptsiz dərmanlar və rəsmi icazə verilmiş tibbi metodlar reklam oluna bilər.

Həsənova xatırladıb ki, səhiyyə naziri tərəfindən 2011-ci ildə imzalanmış əmrdə də həkimlərin elmi çıxışlarında və mediada yalnız etik çərçivəyə sadiq qalması, reklam xarakterli və qeyri-sağlam rəqabət elementlərindən çəkinməsi tələb olunur.

Onun sözlərinə görə, həkimlərin əsas vəzifəsi xəstələrin sağlamlığını qorumaqdır, reklam alətinə çevrilmək yox.