Səhiyyə Nazirliyinin Elmi-Tədqiqat Kardiologiya İnstitutunun İnvaziv Kardiologiya şöbəsində ağır və mürəkkəb klinik vəziyyəti olan pasiyentin müalicə taktikasının müəyyənləşdirilməsi məqsədilə multidissiplinar konsilium keçirilib.

Azmedinfo.az xəbər verir ki, İnstitutun direktoru, professor Gülnaz Dadaşovanın rəhbərliyi ilə keçirilən konsiliumda müalicə işləri üzrə direktor müavini Afiyəddin İsgəndərov, şöbə müdiri Mədinə Əzimova, invaziv kardioloqlar Oktay Musayev, Nicat Baxşəliyev, Rəşad Əliyev və ürək-damar cərrahı Anar Əliyev iştirak ediblər.

Konsilium zamanı pasiyentin klinik vəziyyəti, koronar anatomiyası, aparılmış müayinələrin nəticələri və mümkün müdaxilə strategiyaları ətraflı təhlil olunub, optimal müalicə yanaşması birgə müzakirə edilib.

Mürəkkəb ürək-damar patologiyalarında düzgün müalicə taktikasının müəyyənləşdirilməsi müxtəlif ixtisaslı mütəxəssislərin birgə klinik təcrübəsinə və elmi əsaslandırılmış yanaşmasına əsaslanır. Bu yanaşmanın əsas məqsədi hər bir pasiyent üçün təhlükəsiz, əsaslandırılmış və fərdiləşdirilmiş müalicə strategiyasının seçilməsidir.