Şəhid ailəsində dünyaya gələn vaxtından əvvəl doğulmuş əkiz körpələr Azərbaycan Respublikası Səhiyyə Nazirliyinin K.Y. Fərəcova adına Elmi-Tədqiqat Pediatriya İnstitutunda (ETPİ) müalicə aldıqdan sonra evə yazılıblar.

Azmedinfo.az xəbər verir ki, vəziyyətlərinin ağırlığı nəzərə alınaraq körpələr institutun müvafiq şöbələrinə yerləşdirilib.

Müayinələr nəticəsində körpələrdən birinə yenidoğulmuşun tənəffüs çatışmazlığı, pnevmoniya və doğuş zamanı az bədən çəkisi (1650 qram), digərinə isə az bədən çəkisi (1830 qram) və neonatal sarılıq diaqnozları qoyulub.

İnstitutun həkimləri tərəfindən körpələrə müvafiq tibbi yardım göstərilib, müalicə prosesi daim nəzarətdə saxlanılıb. Körpələrdən birinin vəziyyəti stabilləşdikdən sonra müalicəsinin davam etdirilməsi məqsədilə o da Vaxtından qabaq doğulmuşların patologiyası şöbəsinə köçürülüb.

Aparılan kompleks müalicə tədbirləri nəticəsində hər iki körpənin sağlamlıq vəziyyətində əhəmiyyətli yaxşılaşma əldə olunub. Onların tənəffüs funksiyaları bərpa edilib, qidalanmaları normallaşıb və bədən çəkiləri artıb. Nəticədə, hər iki körpənin çəkisi 2000 qrama çatdırılıb və onlar qənaətbəxş vəziyyətdə evə buraxılıblar.

Körpələrin ailə üzvləri göstərilən yüksək ixtisaslı tibbi xidmətə, həssas və qayğıkeş münasibətə görə ETPİ-nin rəhbərliyinə, müalicə həkimlərinə və bütün tibb heyətinə dərin minnətdarlıqlarını bildiriblər.

Qeyd edək ki, ETPİ şəhid və qazi ailələrinə diqqət və qayğının göstərilməsini fəaliyyətinin əsas istiqamətlərindən biri kimi daim diqqətdə saxlayır.

İnstitutun kollektivi körpələrə sağlam, xoşbəxt və uzun ömür arzulayır.