Səhiyyə Nazirliyi Milli Hematologiya və Transfuziologiya Mərkəzində hematoloji xəstəliklər zamanı təcili tibbi yardım və təxirəsalınmaz müdaxilələrə həsr olunmuş seminar keçirildi. Tədbir sahə üzrə tanınmış mütəxəssislərdən biri olan Dr. Hümbətov Orxan tərəfindən aparıldı.

Azmedinfo.az xəbər verir ki, seminar zamanı iştirakçılara hematoloji xəstəliklərdə rast gəlinən kritik vəziyyətlər, təcili yardımın göstərilmə prinsipləri, effektiv müdaxilə üsulları və kliniki halların idarə olunması ilə bağlı ətraflı məlumat təqdim edildi. Müzakirələrdə leykozlar, aplastik anemiya, ağır qanaxmalar, tromboz və digər hematoloji təcili hallarda tətbiq edilən müasir yanaşmalar vurğulandı.

Tədbirdə hematoloqlar, reanimatoloqlar, transfuzioloqlar, digər tibbi mütəxəssislər və bu sahəyə maraq göstərən şəxslər iştirak edərək mövzu ətrafında aktiv fikir mübadiləsi apardılar. Seminar interaktiv formada keçdi və iştirakçılar real kliniki hallar əsasında müxtəlif ssenarilər üzərində praktiki müzakirələr aparmaq imkanı əldə etdilər.