Səhiyyə xidməti ilə əlaqəli infeksiyalar (HAI) tibbi xidmət zamanı baş verən ən geniş yayılmış arzuolunmaz hadisələrdən biri olmaqla, xəstələnmə və ölüm hallarına, eləcə də həyat keyfiyyətinə ciddi təsir göstərən mühüm ictimai səhiyyə problemidir.

Azmedinfo.az xəbər verir ki, Ümumdünya Səhiyyə Təşkilatı (ÜST) infeksiyaların profilaktikası və infeksion nəzarət (İPİN) sahəsində HAI üzrə epidemioloji nəzarət sistemlərinin gücləndirilməsini əsas prioritetlərdən biri kimi müəyyənləşdirib. Bu istiqamətdə məqsədlərdən biri HAI və antimikrob preparatlara davamlılıq (AMR) üzrə milli epidemioloji nəzarət sistemlərinin yaradılması və inkişaf etdirilməsidir.

Bu məqsədlə ÜST Azərbaycan da daxil olmaqla altı ölkədə HAI üzrə epidemioloji nəzarət potensialının gücləndirilməsinə yönəlmiş layihəyə başlayıb.

Layihə çərçivəsində Nöqtəvi Yayılma Sorğusunun (Point Prevalence Survey – PPS) keçirilməsinə hazırlıq işləri aparılır və səhiyyə işçiləri üçün praktiki təlimlər təşkil olunur. ÜST, Azərbaycan Respublikasının Səhiyyə Nazirliyi və TƏBİB-in əməkdaşlığı ilə Bakıdakı Yeni Klinikada keçirilən üçgünlük təlimdə gələcəkdə PPS-i həyata keçirəcək iki komandanın 25 üzvü iştirak edib.

ÜST ekspertləri 21–25 sentyabr 2026-cı il tarixlərində Sabunçu xəstəxanasında milli və xəstəxana səviyyəli komandalara HAI üzrə PPS-in həyata keçirilməsinə hazırlıqla bağlı dəstək göstərirlər. Sentyabrın 21–22-də məlumatların toplanması və təhlili, planşetlərin hazırlanması və elektron məlumat toplama tətbiqindən istifadə üzrə praktiki təlimlər keçirilib.

HAI üzrə PPS-in rəsmi tətbiqinə sentyabrın 23-dən başlanılması nəzərdə tutulur. Sentyabrın 23–25-də ÜST ekspertləri prosesin ilkin mərhələsində texniki və metodiki dəstək göstərəcək, yerində müşahidələr aparacaqlar.

Fəaliyyətlərin əsas məqsədi Azərbaycanda infeksiyaların profilaktikası və nəzarəti tədbirlərinin gücləndirilməsi və səhiyyə xidməti ilə əlaqəli infeksiyalar üzrə dayanıqlı milli epidemioloji nəzarət potensialının formalaşdırılmasıdır.