Yanğın təhlükəsizliyi ilə bağlı təlim keçirildi

14 Fevral 2025

604

Azərbaycan Gömrük İşçiləri Həmkarlar İttifaqı Birliyi tərəfindən Mərkəzi Gömrük Hospitalında ilkin yanğın təhlükəsizliyi qaydaları ilə bağlı təlim keçirilib.

Azmedinfo.az-a Hospitaldan verilən məlumata görə, təlimdə Mərkəzi Gömrük Hospitalının rəisi-Baş həkim Bəxtiyar Musayev, Texniki-təsərrüfat şöbəsinin rəis müavini Pərviz Sadıqov, Hospitalın müxtəlif şöbələrinin rəisləri, əməkdaşlar, orta tibb personalı, həkim rezidentlər və texniki işçilər, o cümlədən Azərbaycan Gömrük İşçiləri Həmkarlar İttifaqı Birliyinin sədr müavini Asəf Ağayev, Baş texiniki əmək müfəttişi Yaşar Yusubov və Azərbaycan Respublikası Dövlət Gömrük Komitəsinin İnfrastrukturun İnkişafı İdarəsinin baş inspektoru Əziz Cəfərov iştirak ediblər.

Təlim zamanı salamlama nitqi ilə çıxış edən Mərkəzi Gömrük Hospitalının rəisi-Baş həkim Bəxtiyar Musayev Hospitalda yanğın təhlükəsizliyi ilə bağlı mütəmadi olaraq həyata keçirilən fəaliyyətlər barədə məlumat verib və bu məsələnin daim diqqət mərkəzində saxlanıldığını vurğulayıb.

Daha sonra Azərbaycan Gömrük İşçiləri Həmkarlar İttifaqı Birliyinin sədr müavini Asəf Ağayev gömrük sistemində Həmkar təşkilatların hər birində bu qəbildən tədbirlərin həyata keçirildiyi barədə məlumat verib və yanğın təhlükəsizliyinin təmin edilməsinin mühüm əhəmiyyətindən bəhs edib. Həmçinin Asəf Ağayev nəzəri təlimlərin növbəti mərhələlərdə praktiki təlimlərlə davam etdiriləcəyini və prosesin mütəmadi xarakter daşıyacağını da bildirib.

Təlim zamanı Əziz Cəfərov və Yaşar Yusubov ilkin yanğın zamanı düzgün davranış, ilkin yanğınsöndürmə avadanlıqları və fərdi mühafizə vasitələrindən istifadə qaydaları barədə geniş məlumat verib, yanğın zamanı zəruri tədbirlər, təhlükəsizliyin təmin olunması üçün davranış qaydaları, ilkin yanğın təhlükəsizliyi qaydaları, yanğın şkafının qapısının açılması, yanğın şlanqının açılması üsulu, su kranı, su şlanqının idarə olunması proseslərini ardıcıl şəkildə izah ediblər.

Təlimin auditoriyanı maraqlandıran sualların cavablandırılması ilə yekunlaşıb.