Dünyanın bir çox ölkəsində hər il fevralın 15-i Beynəlxalq Uşaq Xərçəng Xəstəlikləri ilə Mübarizə Günü qeyd olunur. Bu günün simvolu kimi qəbul edilmiş qızılı lent uşaqların qlobal cəmiyyət üçün çox dəyərli olduğunu, həmçinin kiçik yaşda ağır xəstəliklə mübarizə aparmağın necə şücaət tələb etdiyini xatırladır.

Azmedinfo.az xəbər verir ki, Beynəlxalq Uşaq Xərçəng Xəstəlikləri ilə Mübarizə Gününün əsas məqsədi uşaq onkologiyasının problemlərinə diqqəti cəlb etməklə yanaşı, həm də son illərdə bu sahədə əldə edilmiş mühüm uğurlardan danışmaqdır.

Cəmi iyirmi il əvvəl xərçəng ən dəhşətli diaqnoz kimi qəbul edilirdi, az qala ölüm hökmü kimi dəyərləndirilirdi. İndi vəziyyət kəskin şəkildə dəyişib. Hesablamalar göstərir ki, bu gün leykemiya və limfomalı uşaqların 90% -dən çoxu və retinoblastomalı xəstələrin 97% -dən çoxu sağalır.

Bu gün tibb elminin və səhiyyə xidmətlərinin qazandığı uğurlar uşaq onkoloji xəstəliklərin müalicəsində ən müasir, yüksək texnoloji üsullardan istifadə etməyə imkan verir.

Heç kəsə sirr deyil ki, onkoloji xəstəliklərin erkən diaqnozu çox vacib əhəmiyyət kəsb edir. Uşaq onnkoloji xəstəliklərində də diaqnoz nə qədər tez qoyulsa, uşağın sağalma şansı bir o qədər yüksəkdir. Vaxt itirməmək çox vacibdir. Bir neçə gün və ya həftəlik gecikmə xəstəliyin başqa bir mərhələyə keçməsinə gətirib çıxarır. Araşdırmalar göstərir ki, ilkin diaqnozun qoyulmasında da son dövrdə mühüm nəticələr əldə edilib. Belə ki, son bir neçə ildə yeni aşkarlanmış şişlərin sayı 25% artıb.

Uşaq xərçəng xəstəlikləri ilə mübarizə aparan digər vacib komponent reabilitasiyadır. Ağır müalicə və ya cərrahi əməliyyat ciddi nəticələrsiz ötmür. Uşaq bütün normal funksiyalarını itirə bilir, sanki körpəyə çevrilir. Və sonra, reabilitasiya mərkəzlərinin mütəxəssislərinin köməyi ilə uşaqlar yenidən yeriməyi, danışmağı, bədənlərini idarə etməyi və daha çox şey öyrənirlər. Hazırda həm iri dövlət mərkəzlərinin açılması, həm də özəl reabilitasiya mərkəzlərinin köməyi ilə xərçəng daşıyıcısı olan uşaqlar üçün reabilitasiya imkanları xeyli artıb.

Bu gün xəstə uşaqlara verə biləcəyimiz dəstəyin və məhəbbətin nə qədər gərəkli olduğunu, bütün çətinliklərə baxmayaraq onlara təbəssüm və ən yaxşıya inamını qoruyub saxlamağın nə qədər vacib olduğunu bir daha xatırlatmaq istərdik.

Uşaqlar bizim gələcəyimizdir!