Kardioloq Aleksandr Ostaşkov qanı durultmağa kömək edən məhsulları açıqlayıb. Onun sözlərinə görə, qanın həddindən artıq qatı olması onun damarlar boyunca hərəkətini çətinləşdirir və tromb yaranması riskini artırır.

Azmedinfo.az "Actualnews" portalına istinadən yazır ki, həkim nəfəs darlığı, yorğunluq hissi, baş ağrısı kimi əlamətlərə diqqət yetirməyi tövsiyə edib. Dəridə göyümtül rəngin əmələ gəlməsi təhlükəli əlamət sayılır. Əgər bu simptomlara ürək döyüntülərinin sürətlənməsi də əlavə olunarsa, dərhal həkimə müraciət etmək lazımdır.

Kardioloq profilaktik məqsədlə qan dövranını yaxşılaşdıran və qanın durulmasına kömək edən məhsulların gündəlik rasiona daxil edilməsini məsləhət görüb. O bildirib ki, tərəvəzlər, meyvələr, qoz-fındıq, müxtəlif toxumlar, eləcə də omeqa-3 ilə zəngin olan balıq növləri, məsələn, qızılbalıq və skumbriya qanı durultmağa kömək edir.

Qan dövranı sisteminə E vitamini də müsbət təsir göstərir. Bu vitamin ispanaq, pomidor, kivi və avokadoda bol miqdarda mövcuddur. Həkim həmçinin sürətli qida, şirniyyat və qırmızı ətin qəbulunu azaltmağı məsləhət görüb, çünki bu məhsullar qanın qatılığını artırır.

İçkilər arasında ən faydalısı yaşıl çay hesab olunur, lakin həkim gündəlik su qəbulunun artırılmasının daha vacib olduğunu vurğulayıb. Kofein və şəkərin miqdarını isə azaltmaq tövsiyə olunur.

Kardioloq qeyd edib ki, həftə ərzində fiziki aktivliyə ən azı 150 dəqiqə vaxt ayrılmalıdır. Bu məqsədlə yoqa, gəzinti və üzgüçülük kimi fəaliyyət növləri ürəyi möhkəmləndirir və qan dövranını yaxşılaşdırır.