Ürəyin normal ritmindən kənar döyünməsi ilə xarakterizə olunan aritmiyalar, orqanizmin ən həyati mexanizmlərində baş verən ciddi dəyişikliklərin xəbərçisi ola bilər.

Azmedinfo.az Azərbaycan Kardiologiya Cəmiyyətinin məlumatına əsasən xəbər veri ki, bu pozulmalar zamanı ürək çox sürətli, çox yavaş və ya tamamilə nizamsız şəkildə fəaliyyət göstərir. Tibbi praktikada ürək döyüntüsünün dəqiqədə 100-dən çox olması taxikardiya, 60-dan aşağı düşməsi bradikardiya, ən çox rast gəlinən nizamsız ritm isə atrial fibrilyasiya kimi təsnif edilir. Bəzən tamamilə sağlam insanlarda da rast gəlinən "artıq vurğular", yəni ekstrasistollar da bu qrupun bir hissəsidir.

Pasiyentlər adətən ürəkdöyünmə, sinədə "boşluq" və ya "sıçrama" hissi, başgicəllənmə və yorğunluqdan şikayət edirlər, ağır hallarda isə bu vəziyyət qəfil bayılmalara səbəb ola bilir. Bu narahatlıqların kökündə duran səbəblər müxtəlifdir. Bura ürək və tiroid xəstəlikləri ilə yanaşı, elektrolit pozulmaları, stress, yuxusuzluq, həmçinin kofein və enerji içkilərinin həddindən artıq istifadəsi daxildir. Xüsusilə uzun müddət davam edən, tez-tez təkrarlanan və sinə ağrısı və ya təngnəfəsliklə müşayiət olunan ritm pozulmaları həyati təhlükə daşıdığı üçün mütləq həkim nəzarəti tələb edir.

Müalicə prosesi yalnız peşəkar kardioloq tərəfindən aritmiyanın spesifik növü müəyyən edildikdən sonra fərdi qaydada təyin edilir. Unutmaq olmaz ki, hər ürəkdöyünmə mütləq şəkildə patoloji aritmiya hesab edilməsə də, ritm pozulmalarını diqqətdən kənar qoymamaq və vaxtında müayinə olunmaq sağlam gələcəyin rəhnidir.