38 həftəlik hamiləlikdən 2430 qram çəki ilə özəl tibb müəssisələrindən birində dünyaya gələn yenidoğulmuş, doğulduqdan dərhal sonra Səhiyyə Nazirliyinin K.Y.Fərəcova adına Elmi-Tədqiqat Pediatriya İnstitutunun Yenidoğulmuşların reanimasiya və intensiv terapiya şöbəsinə təxliyə olunub.

Azmedinfo.az xəbər verir ki, aparılan instrumental və laborator müayinələr nəticəsində körpədə anadangəlmə qida borusunun atreziyası və distal traxeoezofageal fistul (nəfəs borusu ilə qida borusu arasında patoloji əlaqə) aşkarlanıb. Təcili tibbi göstəriş əsasında pasiyentə icra olunan sağtərəfli torakotomiya əməliyyatı ilə distal traxeoezofageal fistul ləğv edilib və ezofaqoezofaqostomiya (qida borusunun uclarının bir-birinə tikilməsi) əməliyyatı uğurla həyata keçirilib.

Mürəkkəb cərrahi müdaxilə uşaq cərrahı Umud Musayev tərəfindən icra olunub. Cərrahi briqadanın tərkibində assistent Zülfiyyə Məmmədova və anestezioloq Nailə Səlimova da iştirak ediblər.

Əməliyyatdan sonra körpənin müalicəsi Yenidoğulmuşların reanimasiya və intensiv terapiya şöbəsində, şöbə müdiri Xuraman Məmmədovanın rəhbərliyi və reanimatoloq Sevinc Nəbiyevanın birbaşa nəzarəti altında intensiv şəkildə davam etdirilib.

Postoperativ dövrdə aparılan nəzarət kontrast müayinəsi zamanı anastomoz (birləşmə) nahiyəsində hər hansı sızma qeydə alınmayıb. Vəziyyəti stabilləşən körpə 29 iyun 2026-cı il tarixində Uşaq Cərrahiyyəsi şöbəsinə köçürülüb. Hazırda tam enteral (təbii yolla) qidalanan körpədə qusma halları yoxdur və ümumi vəziyyəti qənaətbəxş qiymətləndirilir.

Körpənin valideynləri övladlarının yenidən sağlamlığına qovuşmasında əməyi keçən bütün həkim heyətinə və tibb personalına göstərilən yüksək peşəkarlıq, diqqət və qayğıya görə dərin minnətdarlıqlarını bildiriblər.