Çin mənşəli “ba duan jin” praktikası – yavaş hərəkətlər, nəfəs məşqləri və meditasiya elementlərini birləşdirən sistem arterial təzyiqin azaldılması üçün tövsiyə olunur.

Azmedinfo.az JACC (Journal of the American College of Cardiology)-də dərc olunan geniş klinik tədqiqatın nəticələrinə diqqət çəkərək, sözügedən üsulun sürətli yerimə ilə demək olar ki, eyni dərəcədə effektiv olduğunu bildirir.

Yüksək arterial təzyiq ürək-damar xəstəliklərinin əsas risk faktorlarından biri hesab olunur. Həkimlər adətən təzyiqin nəzarətdə saxlanması üçün fiziki aktivliyi tövsiyə etsələr də, bir çox insanın müntəzəm idman üçün vaxtı və ya imkanı olmur.

“Ba duan jin” ənənəvi Çin gimnastikası olub, səkkiz ardıcıl hərəkətdən ibarətdir. Bu sistemdə orta intensiv aerob yük, dartınma hərəkətləri, izometrik məşqlər və şüurlu nəfəs texnikaları birləşir. Məşqlər adətən 10–15 dəqiqə davam edir və xüsusi avadanlıq tələb etmir.

Tədqiqata 40 yaşdan yuxarı, sistolik təzyiqi 130–139 mm civə sütunu arasında olan 216 nəfər cəlb olunub. İştirakçılar üç qrupa bölünüb: bir qrup “ba duan jin” məşqləri edib, ikinci qrup sürətli yerimə ilə məşğul olub, üçüncü qrup isə fiziki aktivliyi sərbəst seçib.

“Ba duan jin” qrupunda məşqlər həftədə 5 gün aparılıb. Üç ay sonra bu iştirakçılarda sutkalıq sistolik təzyiqin orta hesabla 3 mm civə sütunu azalması müşahidə olunub, ümumi göstəricilərdə isə 5 mm civə sütununa qədər eniş qeydə alınıb. Bu təsir bir il sonra da davam edib.

Nəticələr bəzi hipertoniya dərmanlarının təsirinə bənzər və ya sürətli yerimə ilə müqayisə oluna biləcək səviyyədə olub. Mütəxəssislər bildirirlər ki, bu gimnastika sadə, təhlükəsiz və gündəlik profilaktika üçün rahat tətbiq edilə bilən bir üsuldur.