Rusiyalı biokimyaçılar onkoloji xəstəliklərin müalicəsində effektivliyi əhəmiyyətli dərəcədə artıra biləcək yeni yanaşma təqdim ediblər. Yeni metod dərman maddəsini birbaşa şiş nahiyəsinə çatdıran nanokonteynerlərdən istifadəni nəzərdə tutur. Alimlərin sözlərinə görə, bu texnologiya preparatın təsir gücünü dəfələrlə artıra bilər.

Azmedinfo.az "İzvestiya" nəşrinə istinadən yazır ki, Rusiya Elmlər Akademiyasının akademiki Sergey Deev Novosibirskdə keçirilən Ümumrusiya konfransında kimyaterapiya preparatlarının daşınması üçün tamamilə yeni platformanın hazırlandığını bildirib. Melanoma modeli üzərində aparılan təcrübələrdə yeni üsulun effektivliyi standart kimyaterapiya ilə müqayisədə 10 dəfə yüksək olub.

Deevin məruzəsində dərmanların çatdırılması üçün tərkibində kimyaterapiya preparatı olan və qan dövranında sürətlə parçalanan xüsusi nanokonteynerlərin hazırlanmasından bəhs edilir.

Alimin təqdimatında qeyd olunur ki, melanoma xəstəliyinin ağciyərlərdə erkən metastazları modeli üzərində aparılan canlı orqanizm sınaqlarında (in vivo) bu yanaşmanın effektivliyi ənənəvi kimyaterapiyadan dəfələrlə yüksək nəticə göstərib.

Texnologiyanın əsasını metal-orqanik karkaslar təşkil edir. Bu strukturların kəşfi 2025-ci ildə Nobel mükafatına layiq görülüb. Rusiya alimləri müəyyən ediblər ki, bu birləşmələr insan qanında olan fosfat ionlarının təsiri altında asanlıqla parçalanır.

Bu xüsusiyyət sayəsində nanokonteynerlər təxminən 30–60 dəqiqə ərzində parçalanaraq, tərkibindəki doksorubisini şişi qidalandıran qan damarlarının yaxınlığında sərbəst buraxır.

Sergey Deev bildirib ki, fosfat ionlarının təsiri ilə nanokonteynerlər sürətlə parçalanır və təxminən yarım saat–bir saat ərzində böyük miqdarda doksorubisin ayrılır. Preparat qan damarlarına yaxın yerləşən xərçəng hüceyrələrinə daxil olur və nəticədə müalicənin effektivliyi təxminən 10 dəfə artır.

Əvvəllər suda zəif həll olması və sağlam toxumalara toksik təsiri ilə tanınan doksorubisin bu texnologiya vasitəsilə daha məqsədyönlü şəkildə bədxassəli hüceyrələrə çatdırılır.

Alimlər bildirirlər ki, bu texnologiya gələcəkdə digər xərçəng növlərinin müalicəsinə də uyğunlaşdırıla bilər. Növbəti mərhələdə aparılacaq klinik sınaqlar metodun insanlarda təhlükəsizliyini və effektivliyini təsdiqləməlidir.