Hindistanda 47 yaşlı qadında döş xərçənginin uğurlu müalicəsindən iki il yarım sonra başlayan davamlı baş ağrısının səbəbi gözlənilməz olub. Müayinələr nəticəsində məlum olub ki, ağrıya səbəb kəllə sümüyündə yerləşən döş xərçəngi metastazıdır.

Azmedinfo.az "Doctor Piter" nəşrinə istinadən yazır ki, qadına əvvəllər sol süd vəzisinin III mərhələ xərçəngi diaqnozu qoyulmuşdu. O, kimyaterapiya, cərrahi əməliyyat, şüa və hormonal müalicə alaraq remissiya mərhələsinə çatmışdı.

Lakin 2,5 il sonra bütün başı əhatə edən, üç aydan çox davam edən və ağrıkəsicilərlə azalmayan güclü baş ağrıları yaranıb. Digər nevroloji əlamətlər olmasa da, nevroloq müayinə zamanı qadının alın nahiyəsində ağrısız, sərt və hərəkətsiz şişkinlik aşkar edib.

Kontrastlı maqnit-rezonans tomoqrafiyası (MRT) kəllənin alın sümüyündə iri törəmə olduğunu göstərib. Müayinələr onun döş xərçənginin metastazı olduğunu təsdiqləyib.

Həkimlərin sözlərinə görə, şiş beynin əsas venoz damarlarından biri olan yuxarı sagittal sinusun üzərində yerləşdiyi üçün nə cərrahi əməliyyat, nə də biopsiya təhlükəsiz hesab edilib. Buna görə pasiyentə əvvəlcə şüa terapiyası, daha sonra isə hədəfli (target) və hormonal müalicə təyin olunub.

Müalicədən üç ay sonra baş ağrısının intensivliyi əhəmiyyətli dərəcədə azalıb, alın nahiyəsindəki şişkinlik də kiçilib.

Onkoloqlar bildirirlər ki, döş xərçəngi adətən bel fəqərələri və bud sümüyünə metastaz verir. Kəllə sümüklərinə metastaz isə çox nadir rast gəlinir və halların təxminən yarısında heç bir simptom vermir. Bununla belə, belə metastazlar yerli ağrıya, beyin qişaları zədələndikdə isə kəllədaxili təzyiqin artması ilə bağlı əlamətlərə səbəb ola bilər.

Mütəxəssislər vurğulayırlar ki, xərçəng keçirmiş şəxslərdə səbəbi bilinməyən və uzun müddət davam edən baş ağrıları olduqda neyroradioloji müayinələrin aparılması vacibdir. Erkən diaqnoz xəstəliyin irəliləməsinin qarşısını almağa və pasiyentin həyat keyfiyyətini yaxşılaşdırmağa kömək edir.