Boyun, qoltuqaltı və ya qasıq nahiyəsində limfa düyünlərinin böyüməsi insanlarda ciddi narahatlıq yaratsa da, bu hal əksər hallarda orqanizmin infeksiyalara qarşı təbii müdafiə reaksiyasıdır.

Azmedinfo.az xəbər verir ki, Mərkəzi Gömrük Hospitalının terapevti Xumar Novruzovanın sözlərinə görə, limfa düyününün böyüməsi hər zaman bədxassəli və ya təhlükəli prosesin göstəricisi hesab olunmur.

"Soyuqdəymə, boğaz və badamcıq iltihabı, diş və ağız boşluğu problemləri zamanı limfa düyünlərinin böyüməsi və ağrılı olması kəskin infeksiyanın təbii nəticəsidir və əsas səbəb aradan qalxdıqdan sonra onlar tədricən kiçilir. Lakin düyünün sərt və hərəkətsiz olması, ətraf toxumalara yapışması, getdikcə böyüməsi və uzun müddət çəkilməməsi daha ciddi araşdırma tələb edən əlamətlərdəndir", - deyə həkim vurğulayıb.

Ekspert qeyd edib ki, eyni zamanda bir neçə limfa düyününün bir-birinə yapışması vərəm kimi xroniki infeksiyaların və ya digər sistem xəstəliklərinin göstəricisi ola bilər.

Mütəxəssis onu da bildirib ki, limfa düyünlərində belə hallar müşahidə edildikdə təşvişə düşmədən, özbaşına müalicəyə əl atmadan vaxtında həkim müayinəsindən keçmək vacibdir.