Mərkəzi Gömrük Hospitalının terapevti Xumar Novruzova bronxial astma ilə bağlı pasiyentlərin ən çox verdiyi üç sualı cavablandırıb.

Azmedinfo.az xəbər verir ki, həkim bildirdiyinə görə, bronxial astma xroniki xəstəlik olsa da, düzgün müalicə və mütəmadi həkim nəzarəti ilə nəzarətdə saxlamaq mümkündür. Astma diaqnozu insanın aktiv həyat tərzindən uzaq qalması demək deyil. Müalicənin əsas məqsədi simptomları nəzarətdə saxlamaq və xəstəliyin kəskinləşməsinin qarşısını almaqdır.

Xumar Novruzovanın sözlərinə görə, inhalyatorların, xüsusilə inhalyasion steroidlərin “hormonal olduğu üçün zərərli” olması ilə bağlı fikirlər doğru yanaşmanı əks etdirmir. Həkim təyinatı ilə düzgün istifadə olunan bu preparatlar tənəffüs yollarında iltihabı azaltmağa və astmanın nəzarətdə saxlanmasına kömək edir.

Terapevt qeyd edib ki, inhalyatorlardan istifadə dərmana asılılıq yaratmır. Astma xroniki xəstəlik olduğundan bəzi pasiyentlərdə uzunmüddətli müalicəyə ehtiyac yarana bilər. Bu, dərmandan asılılıq deyil, xəstəliyin xüsusiyyətləri ilə bağlıdır.

Həkim pasiyentlərə dərmanı özbaşına dayandırmamağı, dozanı dəyişməməyi və müalicə ilə bağlı qərarları yalnız həkimlə məsləhətləşdikdən sonra verməyi tövsiyə edib.