Dünya elminə verdiyi misilsiz töhfələrlə təkcə Türk dünyasının deyil, bütün bəşəriyyətin fəxrinə çevrilən Nobel mükafatı laureatı Əziz Səncərin elmi axtarışları bu gün də yeni nəsillərə yol göstərir. Onun kəşfləri sadəcə laboratoriya divarları arasında qalan nəzəriyyələr deyil, bəşəriyyətin ən ağrılı problemlərinin həllinə yönəlmiş canlı təcrübədir. Əziz Səncərin qazandığı tarixi uğur bizim üçün yalnız kimya sahəsində əldə edilmiş Nobel mükafatı deyil, fundamental elmin insan sağlamlığına və müasir təbabətə necə xidmət edə biləcəyinin ən parlaq nümunələrindən biridir.

Azmedinfo.az xəbər verir ki, bu fikirləri səhiyyə nazirinin müşaviri Elgün Səmədov Azərbaycan Milli Elmlər Akademiyasında (AMEA) dünyaşöhrətli alim, professor Əziz Səncərin 80 illik yubileyinə həsr olunmuş təntənəli tədbirdə çıxışı zamanı səsləndirib.

E.Səmədov böyük alimin 2022-ci ildə Bakıda keçirilmiş “TEKNOFEST Azərbaycan” festivalı çərçivəsində gənclərlə unudulmaz görüşünü və orada söylədiyi dəyərli fikirləri diqqətə çatdırıb. Qeyd olunub ki, dünyaşöhrətli alim xərçəng xəstəliyi üzərindəki araşdırmalarını heç vaxt Nobel mükafatı qazanmaq xatirinə aparmadığını, əsas amalının bu amansız bəlaya qarşı mübarizədə bəşəriyyətə faydalı bir vasitə bəxş etmək olduğunu xüsusi vurğulamışdı.

“Əziz müəllimin gənclərə tövsiyəsi də çox aydın və ibrətamizdir: mükafat və şöhrət üçün deyil, insanlığa və vətənə fayda vermək amalı ilə yorulmadan çalışın”, – deyə nazir müşaviri əlavə edib.

Çıxışında dövlət başçısının elmə və alimə verdiyi yüksək qiymətə toxunan E.Səmədov, Azərbaycan Respublikasının Prezidenti İlham Əliyevin 2022-ci ildə “TEKNOFEST Azərbaycan” festivalında Əziz Səncər haqqında səsləndirdiyi tarixi sözləri xatırladıb: “Əziz Səncər kimi insanlar gənclər üçün örnəkdir, nümunədir. Həm alim, həm vətəndaş, həm türk, həm vətənpərvər insandır”.

Sonda E.Səmədov qeyd edib ki, Əziz Səncər təkcə ali elmi mükafatın sahibi kimi deyil, eyni zamanda fədakar həkim, qayğıkeş müəllim, Türk dünyasının qürur mənbəyi və minlərlə gənc tədqiqatçıya elmin çətin yollarında bələdçilik edən böyük şəxsiyyətdir.