31 oktyabr – 1 noyabr 2026-cı il tarixlərində Rumıniyanın paytaxtı Buxarest şəhərində Avropa Hemofiliya Konsorsiumunun (EHC – European Haemophilia Consortium) təşkilatçılığı ilə qanın laxtalanma pozuntularının müalicəsində yeni texnologiyalara həsr olunmuş beynəlxalq elmi konfrans keçirilib.

Azmedinfo.az xəbər verir ki, nüfuzlu elmi platformada Avropanın müxtəlif ölkələrindən aparıcı alimlər, hematoloqlar, tibb mütəxəssisləri, tədqiqatçılar və pasiyent təşkilatlarının nümayəndələri iştirak ediblər. Tədbirdə Azərbaycanı EHC-nin ölkəmizdən yeganə üzvü olan Hemofiliya və digər Hemostaz Pozuntuları Assosiasiyası təmsil edib.

İki gün davam edən konfransın elmi proqramı irsi qanaxma pozuntularının diaqnostikası və müalicəsində əldə olunan son nailiyyətləri, innovativ texnologiyaları və gələcək inkişaf istiqamətlərini əhatə edib.

Konfrans çərçivəsində faktor və faktorəvəzedici terapiyalar, rebalanslaşdırıcı müalicə yanaşmaları, gen və hüceyrə terapiyaları, innovativ mimetik preparatlar, ilkin hemostaz və fon Villebrand xəstəliyinin müalicəsində tətbiq olunan yeni üsullar müzakirə olunub. Bununla yanaşı, EHC-nin Tibbi Məsləhət Qrupunun iştirakı ilə hematologiya və hemostaz sahəsində yaxın gələcəkdə gözlənilən elmi yeniliklərə həsr olunmuş panel müzakirələri keçirilib.

Müzakirələrdə qanaxma pozuntularının müalicəsində fərdiləşdirilmiş yanaşmaların, yeni nəsil preparatların və gen terapiyalarının yaratdığı imkanların əhəmiyyəti diqqət mərkəzində olub. Bu istiqamətdə elmi yeniliklərin klinik praktikaya tətbiqi, pasiyentlərin müalicə imkanlarının genişləndirilməsi və həyat keyfiyyətinin yaxşılaşdırılması əsas müzakirə mövzularından olub.

Hemofiliya və digər Hemostaz Pozuntuları Assosiasiyasının belə beynəlxalq elmi tədbirlərdə iştirakı Azərbaycanda qanaxma pozuntularının müalicəsi sahəsində qabaqcıl dünya təcrübəsinin öyrənilməsi, müasir müalicə yanaşmalarının tətbiqi və beynəlxalq əməkdaşlığın genişləndirilməsi baxımından mühüm əhəmiyyət daşıyır.

Bu cür platformalarda təmsilçilik həmçinin ölkəmizdə hemofiliya və digər hemostaz pozuntuları ilə yaşayan pasiyentlərin müasir tibbi yeniliklərdən faydalanması, onların müalicə və tibbi xidmət imkanlarının inkişaf etdirilməsi istiqamətində yeni perspektivlər yaradır.