İlk ürək transplantasiyasının birinci ildönümünə həsr olunan “Ürək transplantasiyası həftəsi” çərçivəsində “TRANSPLANT 360° – Diaqnostikadan transplantasiyaya” mövzusunda elmi-praktik konfrans keçirilib.

Azmedinfo.az xəbər verir ki, Milli Məclisin Səhiyyə komitəsinin sədri, akademik Əhliman Əmiraslanov tədbirin açılışında bildirib ki, dövlət başçısı İlham Əliyevin səhiyyə sisteminin inkişafına göstərdiyi diqqət orqan donorluğu və transplantasiya sahəsinin tərəqqisi üçün mühüm zəmin yaradıb. Akademik Koordinasiya Mərkəzinin ürək transplantasiyasının təşkili və həyata keçirilməsindəki rolunu yüksək qiymətləndirib. Səhiyyə nazirinin müavini Nadir Zeynalov isə son illərdə bu sahədə normativ-hüquqi bazanın formalaşdırıldığını və sistemli tədbirlərin görüldüyünü diqqətə çatdırıb.

Orqan Donorluğu və Transplantasiyası üzrə Koordinasiya Mərkəzinin İdarə Heyətinin sədri Yeganə Abbasova çıxışında vurğulayıb ki, Azərbaycanda dörd ürək transplantasiyasının həyata keçirilməsi uzunmüddətli fəaliyyətin nəticəsidir. Bu sahədə ilk mühüm addım Ümummilli Lider Heydər Əliyevin 1999-cu ildə imzaladığı “İnsan orqan və (və ya) toxumalarının transplantasiyası haqqında” qanunla atılıb. Daha sonra 2018-ci ildə ölüm anının təyini meyarları təsdiqlənib, 2020-ci ildə Prezident İlham Əliyev yeni qanunu imzalayıb və 2022-ci ildə Koordinasiya Mərkəzi təsis edilib.

Aparılan maarifləndirmə işləri sayəsində 2025-ci ildə Azərbaycanda və Cənubi Qafqazda ilk dəfə meyit donordan transplantasiya icra olunub. Hazırda meyit donorlardan əldə edilən orqanlarla 85 transplantasiya əməliyyatı reallaşdırılıb. Mərkəzin əsas gələcək hədəfləri sırasında rəqəmsal sümük iliyi donorları reyestrinin tam formalaşdırılması və Azərbaycanın bu sahədə regional mərkəzə çevrilməsi yer alır.

Azərbaycan Ürək və Damar Cərrahiyyəsi Cəmiyyətinin fəxri sədri, professor Kamran Musayev bir il ərzində dörd xəstəyə ürək transplantasiyasının icra edilməsini böyük uğur kimi dəyərləndirib. Tədbirdə Mərkəzin rəsmiləri və mütəxəssisləri Vahid İnformasiya Sistemi (VİS), donorluq qaydaları və Eurotransplant modeli üzrə məruzələrlə çıxış ediblər.

Konfrans panel müzakirələrlə işini davam etdirib. “Ürək transplantasiyası həftəsi” çərçivəsində tədbirlər noyabrın 6-dək sürəcək.