Azərbaycanın yaşıl enerji üzrə tərəfdaşı Səudiyyə Ərəbistanının ACWA Power şirkəti ölkəmizdə səhiyyə, sağlamlıq və ekoloji dayanıqlılıq baxımından mühüm əhəmiyyət kəsb edən dəniz suyunun duzsuzlaşdırılması zavodunun tikintisini həyata keçirəcək.

Azmedinfo.az xəbər verir ki, bununla bağlı saziş Bakıda keçirilən I Azərbaycan Beynəlxalq İnvestisiya Forumu (AIIF) çərçivəsində imzalanıb. Layihə dəniz suyundan gündəlik 300 min kubmetr içməli su istehsalını nəzərdə tutur. Zavodun layihələndirilməsi, tikintisi və 25 il müddətində istismarı ACWA Power tərəfindən icra olunacaq.

Dəyəri 407 milyon ABŞ dolları olan layihə Abşeron yarımadasında artan içməli su tələbatını qarşılamaqla yanaşı, ölkənin su təhlükəsizliyinə, səhiyyə və sağlamlıq infrastrukturuna töhfə verəcək, ekoloji davamlılıq və yaşıl texnologiyaların tətbiqinə xidmət edəcək.

Saziş həmçinin su və torpaq sahəsində elmi-texniki əməkdaşlıq, texnologiya və təcrübə mübadiləsini də əhatə edir.

ACWA Power nümayəndələri vurğulayıblar ki, Azərbaycanda yalnız su layihələrinə deyil, həm də bərpaolunan enerji və yaşıl inkişaf sahələrinə 750 milyon dollarlıq investisiya yatırılır.