Hər kəs sağlam qalmaq üçün gündə 10 min addım atmaq lazım olduğunu eşidib. Bir çox insan artıq bilir ki, bu rəqəm mifdir, bu qədər addım həddindən artıqdır. Amma sağlamlığı qorumaq və konkret xəstəliklərdən uzaq qalmaq üçün əslində nə qədər hərəkət etmək lazım olduğu sualı qalır. Bu suala ABŞ-ın Vanderbilt Universitetinin alimləri tərəfindən aparılan tədqiqat cavab verir. 

Azmedinfo.az "Nature Communications” jurnalında dərc olunan məqaləyə diqqət çəkib:

Addımlar oturaq həyat tərzini kompensasiya edir

Alimlər belə bir yanaşmadan çıxış ediblər ki, azhərəkətli həyat tərzi ölüm riskini artırır və bir çox xroniki xəstəliklərlə, o cümlədən piylənmə, şəkərli diabet, hipertoniya, ürəyin işemik xəstəliyi, ürək çatışmazlığı, xroniki böyrək xəstəliyi, metabolik assosiasiyalı yağlı qaraciyər xəstəliyi (MAZHQ), xroniki obstruktiv ağciyər xəstəliyi (XOAQ), yuxu apnesi və digərləri ilə əlaqələndirilir.

Tədqiqatın məqsədi gün ərzində 8–14 saatını kompüter və masa arxasında keçirən insanların bu riskləri azaltmaq üçün nə qədər addım atmalı olduqlarını müəyyən etmək olub.

Araşdırmaya 15 mindən çox insan cəlb edilib. Hər iştirakçının elektron fitnes izləyicisi (trekeri) olub və bu cihaz həm addım sayını, həm də hərəkətsiz keçirdiyi vaxtı qeydə alıb. Beləliklə, tədqiqat real həyat davranışlarına əsaslanıb və subyektivlik minimuma endirilib.

“10 min addım” tələbi ləğv edilir

Alimlər təsdiqləyiblər ki, xəstəliklərdən qorunmaq üçün gündə 10 min addım şərt deyil və bu rəqəm çox vaxt yerinə yetirilməsi çətin olan bir göstəricidir. Araşdırmaya görə, əksər xəstəliklər riskini azaltmaq üçün gündə 1700–5500 addım kifayət edir. Konkret nəticələr belədir:

piylənmə və MAZHQ-dan qorunmaq üçün — 1700 addım kifayətdir;
hipertoniya və yuxu apnesi riskini ciddi azaltmaq üçün — 2200 addım;
şəkərli diabetin profilaktikası üçün — 5300 addım;
XOAQ üçün — 5500 addım.

Təəccüblü şəkildə ürəyin işemik xəstəliyi və ürək çatışmazlığına qarşı qoruyucu effekt müşahidə olunmayıb. Lakin tədqiqat müəllifləri qeyd edirlər ki, bu, gəzintinin həmin xəstəliklərə təsirinin olmaması demək deyil, çünki əvvəlki çoxsaylı araşdırmalar bunun əksini sübut edib.

Vanderbilt Universitetinin professoru Evan Brittain araşdırmanı belə yekunlaşdırıb: “Bir çoxumuz günün böyük hissəsini masa arxasında keçiririk. Nəticələr göstərir ki, əgər artıq oturub qalmısınızsa belə, bunu kompensasiya etməyin yolu var.”

Onun sözlərinə görə, bunun üçün sadəcə fiziki aktivliklə məşğul olmaq və düzgün yükü müəyyən etmək kifayətdir. Müasir fitnes trekerləri bu prosesi xeyli asanlaşdırır.