Baykonurdan “Soyuz-2.1b” raketdaşıyıcısı buraxılaraq “Bion-M” №2 biosputnikini qütb orbitinə çıxarıb. Peykin göyərtəsində bütöv bir “kosmonavt siçan dəstəsi” — 75 siçan yerləşdirilib. Onlar 25 xüsusi qutuda saxlanılır, hər birində 3 siçan olmaqla.

Azmedinfo.az "Realnoe Vremya"ya istinadən xəbər verir ki, bundan əlavə, 1500 drozofila milçəyi, mikroorqanizm hüceyrə mədəniyyətləri, bitkilər (kalendula, ekinezya, mamır), dənli və paxlalı nümunələr də aparata yüklənib. Həmçinin göbələklər, mamırlar, mikroorqanizmlər və əvvəlki kosmik missiyalarda — 2013-cü ildə “Bion-M” №1 və 2014-cü ildə “Foton-M” ilə kosmosa göndərilən toxumlardan yetişdirilmiş bitkilərin yeni nəsil toxumları da təcrübəyə daxil edilib.

Aparatın xarici hissəsinə isə meteorit imitasiyası yerləşdirilib, onun içində canlı hüceyrələr var. Bu, alimlərə həyatın meteoritin daxilində saxlanılıb-saxlanıla bilməyəcəyini öyrənməyə, yəni kosmik cismin Yer atmosferindən keçərkən yanıb məhv olub-olmadığını müəyyənləşdirməyə kömək edəcək.

Missiya “Roskosmos”, Rusiya Elmlər Akademiyası və Rusiya Tibb-Biologiya Problemləri İnstitutu tərəfindən hazırlanıb. Təcrübə kosmosda 30 gün davam edəcək, daha sonra peyk Orenburq çöllərinə eniş etməlidir. Məqsəd — yüksək enlikli orbitdə (burada kosmik radiasiya Beynəlxalq Kosmik Stansiyanın orbitinə nisbətən 30% çoxdur) uçuşun canlı orqanizmlərə təsirini öyrənməkdir. Bu araşdırmalar gələcəkdə insan bədənini radiasiyadan qorumaq yollarını tapmaq üçün vacibdir — xüsusən də Marsa və daha uzaq kosmik səfərlərə hazırlaşmaq üçün.

Siçanlar Yerə qayıtdıqdan sonra onları xoş taleyin gözləmədiyi bildirilir — mütəmadi olaraq yarılaraq uçuşdan sonrakı bərpa prosesləri araşdırılacaq. Toplanmış məlumatların analizi bir ilə yaxın çəkəcək. İki ildən artıq video material isə süni intellekt tərəfindən emal ediləcək.