“Varfarin Stada” adlı kardioloji dərman vasitəsinin Azərbaycana idxalında süni maneələrin yaradıldığı və bu prosesin Analitik Ekspertiza Mərkəzi tərəfindən ləngidildiyi barədə iddialar sosial şəbəkələrdə geniş müzakirələrə səbəb olub.

Azmedinfo.az xəbər verir ki, Səhiyyə Nazirliyi Analitik Ekspertiza Mərkəzi yayılan iddialarla bağlı açıqlama verərək məsələyə aydınlıq gətirib.

Mərkəzdən verilən açıqlamada vurğulanıb ki, Səhiyyə Nazirliyi və ona tabe qurumlar dərman vasitələrinin idxalı ilə məşğul olmur. Bu işlə yalnız özəl şirkətlər məşğuldur. “Varfarin”lə bağlı məsələyə gəldikdə isə qeyd olunub ki, səsləndirilən iddialar reallığı əks etdirmir.

"Stada Azerbaijan" MMC-nin 11 fevral tarixli müraciəti əsasında AEM tərəfindən verilmiş cavabda yararlılıq müddəti 5 il olan preparatın idxalına icazə verilməməsinin səbəbləri mart ayında göndərilən rəsmi məktubla izah olunub.

Bununla bağlı bildirilib ki, “Dərman vasitələri haqqında” qanunun müvafiq maddəsinə əsasən, dövlət qeydiyyatında olmayan və ya qeydiyyat müddəti bitmiş preparatların (istisnalar nəzərə alınmaqla) idxalına icazə verilmir. Məhz bu səbəbdən qeyd olunan preparatın əvvəlki qeydiyyat şəhadətnaməsi üzrə istehsal edilmiş partiyalarının idxalı məqsədəuyğun hesab edilməyib.

Eyni zamanda qeyd edilib ki, artıq “Varfarin Stada” dərman vasitəsi 7 aprel 2025-ci il tarixində DV №25-00442 nömrəli yeni qeydiyyat şəhadətnaməsi alıb. Ekspertiza rəyinə əsasən yararlılıq müddəti 3 il olan bu dərmanın ölkəyə idxalı üçün heç bir məhdudiyyət yoxdur.